4
Dɛ Nyɔsoa 'wlʋa Ninifʋ -nyʋ 'a dɩsaɩn "kpei ɛ, ɛ nyaa Sonasɩ i 'sʋ ɔ 'kpa 'cɛn. 2 -Wɛe ɔ bae Nyɔsoa i ka ɔ 'na: 'Aa Nyɔsoa, -ta 'ɩn nɩa 'de 'ʋn "bli blʋa "kpei 'dee- ɛ, ɛɛ' -tɩ' 'ma 'tmʋa ɩ ko -taa? Ɩmɩ 'ɩn 'jee nya -wɛe 'ma 'kpa 'kwla 'ma mu Taasisɩ. Dɛ-nʋɛ' ɛmɛ -nɩ 'ɩn 'je kan' 'mɛ ɛɛ' Kea tu nɩɛ nyiɔ 'ɔ wɛe 'je kea 'de ɛɛ nʋ nyʋ 'saa 'ʋn "jrii, ɛɛ' 'cɛn tɛɛn o -wɛe ɛ kma nyɩɔ 'ɔ -tɩ', ɛɛ' -ma 'a 'wlʋ wlu "kpei -tiɛ "i 'de ɛɛ' -kwle dɛsaʋn "kpei 'wlʋ -tɩ. 3 Kaan ka 'jaa Nyɔsoa, -ɩn -duo" 'ma -suu 'ʋn dɛ-nʋɛ' 'ma 'mɩa nmɔ "jri i ɛ je 'ma 'kmʋ nɩa -sii.4 -Wɛe Nyɔsoa wlu ka 'de Sonasɩ -pee ɛ 'na: 'Cɛn -ɩn -kpa kan' -nɛ 'ee, ɛ dɛ 'dɔe -ma nʋʋ?
5 Ɛɛ 'boa 'de mu -wee' 'sʋ Sonasɩ 'wlʋ 'e -kwlɔ -kpae" 'mɛ ɔ muɛ 'e -kwlɔ 'de, 'de 'jrʋ -kwea fɔo 'demɔ ɔ poo poo" "jɛi -wɛe ɔ -tei 'de ɛɛ' -fli -sɔn 'de dɛ -ɛ -jea Ninifʋ -nyʋ "jrii nʋ ɔ 'jeɛ 'je 'de-.
6 Nyɔsoa kea nʋɛ' -wɛe 'puusu- -kan mɛ -ta Sonasɩ nɩa -wɛe ɛ -sii ɔ "jrui -wɛe -ɛɛ -fli ɔɔ nɩ 'e -sɔn 'de -ɛ -je ɔ "jrii "kaea pɛe o -sa. Sonasɩ nɩa 'de 'puusu- -kan -nɛ 'ɛ -fli -sɔn 'sʋ 'mʋa klaa" 'kpa 'de ɔ 'ʋn 'ɛ 'de tu -nɛ ɛɛ' -tɩ' 'ʋn. 7 'Kaa -ta -sɔn' dee jrɛ' ɛ -sɩan' -mɛ Kea dboɛ cɩaɩn"- due' -wɛe -ɛ 'dba 'puusu- -kan -nɛ 'sʋ ɛ jɛ 'sʋɛ. 8 -Jɛ 'jrʋ a 'wlʋ 'a 'sʋɛ, Kea ja poɔ', ɛɛ' poɔ' tu 'wlʋɛ 'e 'jrʋ -kwea, ɛ nɩɛ nɛ', -wɛe 'jrʋ a bla 'de Sonasɩ "jru "kain "kain, Sonasɩ muɛ -kwlʋ 'kpaa 'de- ɔɔ' dɩ cɛn' -gblɛ' -gblɛ' -wee'-, 'sʋ ɔɔ -pɔn 'mɛa i, -wɛe ɔ wlu ka, ɔ 'na: -jɛ -mɛ 'ma 'mɩa "paa ɛ je 'ma 'kmʋ nɩa' -sii.
9 -Wɛe Kea 'na Sonasɩ, 'cɛn -ɩn -kpa 'de 'puusu -kan 'a -tɩ' 'ʋn 'ee, ɛ nmɔ "jrii 'mɛɛ? 'Sʋ ɔ 'na kɩɩn, -bo 'ɩn "kae "jrii mamaʋ -wɛe ɛ 'je 'ma 'mɩa "jru "kpei po mɔ 'de ɛ, 'ɩn nʋɛ dɛ 'dɔe.
10 -Wɛe Nyɔsoa wlu ɔ -pee ɛ 'na: Sonasɩ, 'puusu -kan -ɛ mɛa 'de "maʋ wɩ due' 'di 'de -ɛ -sɔan i 'de "maʋ wɩ due' 'di ɛ, ɛmɛ -ɛɛ wɛe -ma -je 'de -mɛ 'kamɔ ɛ se -ʋn dɛjrɛ' 'kwa 'je, -ɩn se ɛɛ' 'kle jrɛ' 'je, -ɩn se ɛɛ dbo jrɛ' nʋ. 11 -Maa -jea 'puusu -kan 'a wɛe 'dee, 'de -mɛ 'mɔ 'e, 'ɩn seɛ 'bɛɛ 'ɩn 'je Ninifʋ -kwlɔ -ɛ -nɩa -kwlɔ klaa" nyʋ -ʋʋ sea 'dɔe ke saʋn 'a "kpei -sea ka juo 'a "wlu 'a kmɛ' due' kwla 'sɔɔn 120,000 nɩa 'e 'di ɛ, 'ɩn 'je ʋʋpʋ- 'a wɛe 'je -kee! Ɛ ke ʋʋa' nmi -tuu 'kpe ke.